EU yatoa msaada wa kifedha wa euro milioni 150 kwa Tunisia
Umoja wa Ulaya (EU) umetoa msaada wa kifedha, muhimu kwa Tunisia, wa euro milioni 150, Wizara ya Mambo ya Nje ya Tunisia na Tume ya Ulaya zimetangaza.
Imechapishwa:
Ufadhili huu unalenga "kuunga mkono juhudi" za Tunisia "kukuza ufufuaji wa uchumi kupitia uboreshaji wa usimamizi wa fedha za umma na mazingira ya biashara na uwekezaji", kulingana na taarifa iliyotolewa na pande hizo mbili. Msaada huu ulikubaliwa wakati wa kusainiwa kwa makubaliano kimsingi mnamo Julai 16 huko Tunis kwa "Ushirikiano" mpya kati ya EU na nchi ya Afrika Kaskazini, ambayo pia ilijumuisha sehemu muhimu ya mapambano dhidi ya uhamiaji haramu.
Tunisia, ambayo inatoa sehemu nzuri ya rasilimali zake kulipa deni la karibu 80% ya Pato la Taifa, ina hitaji kubwa la ukwasi ili kufadhili ununuzi wa bidhaa zilizopewa ruzuku, kama vile maziwa, unga, mchele au mafuta ya nyumbani vinavyokabiliwa na upungufu wa muda mrefu. Msaada huo utakuwa na "uhamisho wa fedha wa moja kwa moja kwa hazina ya umma ya Tunisia", kulingana na taarifa ya vyombo vya habari, ambayo inathibitisha nia ya "kutekeleza" vipengele vingine (nishati, kubadilishana wanafunzi) katika "ushirikiano wa watu sawa".
Mwanzoni mwa mwezi Oktoba, mzozo ulizuka kati ya Brussels na Tunis, ambayo ilirejesha ufadhili wa euro milioni 60 kwa EU, mbinu ambayo haijawahi kutokea kwa nchi mshirika, kulingana na Brussels. Rais wa Tunisia, Kais Saied, alisema alikataa "hisani" ya EU na akahakikisha kuwa kiasi hicho kililipwa "bila mamlaka ya Tunisia kuwa na taarifa mapema", na kukemea "mashambulizi dhidi ya utu" kutoka kwa nchi yake.
Fedha hizo zilipangwa kama sehemu ya mpango wa usaidizi baada ya Uviko-19, usiyohusiana na itifaki ya Julai, ambayo pia inajumuisha msaada wa euro milioni 105 kwa Tunisia kupambana dhidi ya uhamiaji haramu. Kipengele cha uhamiaji ni mada ya tata, ikiwa ni pamoja na kati ya nchi za Ulaya, inayohusishwa na wasiwasi kuhusu mashambulizi ya haki za wahamiaji nchini Tunisia.
Kwa mujibu wa ripoti iliyochapishwa Jumatatu na Shirika la Kupambana na Mateso Duniani (OMCT), wahamiaji kutoka Kusini mwa Jangwa la Sahara nchini Tunisia wanaishi katika hali "isiyo na heshima" na wanakabiliwa na "kukamatwa kiholela, kulazimishwa kuyahama makazi yao na kufukuzwa kinyume cha sheria" kuelekea mipaka na Libya na Algeria. Zaidi ya wahamiaji 8,500 wamefukuzwa tangu mwezi Juni, kulingana na takwimu zilizowasilishwa kwa shirika la habari la AFP na vyanzo vya kimataifa vya kibinadamu.
