Iran yakanusha kuhusika na mashambulizi ya waasi wa Houthi katika Bahari Nyekundu
Iran siku ya Jumamosi imekanusha shutuma za Marekani za kuhusika kwake katika mashambulizi ya hivi karibuni ya waasi wa Houthi wa Yemen kwenye meli za kibiashara katika Bahari Nyekundu. "Upinzani una nguvu zake na hufanya kulingana na maamuzi na uwezo wake," Naibu Waziri wa Mambo ya Nje wa Iran Ali Bagheri ameliambia shirika la habari la nchini Iran la Mehr.
Imechapishwa:
Kulingana na Mehr, mwanadiplomasia huyo alikuwa akijibu "madai ya nchi za Magharibi" kwamba Tehran ilikuwa "ikiwafahamisha" Wahouthi wa Yemeni kuhusu "eneo ambako meli za Marekani zinaegesha." Wakidai kuunga mkono Wapalestina wa Hamas katika vita vyao dhidi ya Israel, waasi wa Yemeni, wanaoungwa mkono na Tehran, katika wiki za hivi karibuni wamedai mashambulizi kadhaa dhidi ya meli za kibiashara zenye uhusiano na Israeli, kulingana na wao.
Waasi wa Houthi ambao wanadhibiti sehemu kubwa ya Yemen lakini hawatambuliwi na jumuiya ya kimataifa, wanarudia kusema kwamba wataendelea maadamu chakula na dawa hazitarudi kwa wingi wa kutosha katika Ukanda wa Gaza, eneo la Palestina lililoshambuliwa kwa mabomu na kuzingirwa na Israel. kujibu shambulio ambalo halijawahi kufanywa na Hamas mnamo Oktoba 7 kwenye ardhi ya Israeli.
Iran inatambua uungaji mkono wake wa kisiasa kwa Wahouthi, katika vita tangu mwaka 2014 dhidi ya serikali ya Yemeni inayotambuliwa na jumuiya ya kimataifa. Lakini Tehran inakanusha kutoa vifaa vya kijeshi kwa waasi.
Muungano wa nchi kumi
Ili kukabiliana na mashambulizi "ya kutowajibika" ya waasi wa Houthi katika bahari ya Shamu, Lloyd Austin, Waziri wa Ulinzi wa Marekani, alitangaza Jumatatu kuundwa kwa muungano wa kimataifa unaoundwa na nchi kumi, ambazo ni Ufaransa, Uingereza, Bahrain, Kanada, Italia, Uholanzi, Norway, Uhispania na Visiwa vya Shelisheli.
Bahari ya Shamu ni "barabara kuu ya bahari" inayounganisha Bahari ya Mediterania na Bahari ya Hindi, na kwa hiyo Ulaya hadi Asia. Karibu meli 20,000 hupitia Mfereji wa Suez kila mwaka, mahali pa kuingilia na kutoka kwa meli zinazopitia Bahari Nyekundu.
Ikiwa hazitapitia tena Mfereji wa Suez na Bahari Nyekundu, meli zitalazimika kuzunguka Afrika na kupitia Rasi ya Tumaini Jema, ambayo itarefusha safari.