Marekani: Benki ya SVB yafilisika, mamlaka yachukua hatua

Mamlaka ya Marekani imetangaza kuwa itawaruhusu wateja wa Benki ya SVB kutoa amana zao zote, uamuzi ambao wachanganuzi wanaona kuwa sio wa kawaida.

Mamlaka ya Marekani imepiga mnada Benki iliyofilisika ya Silicon Valley (SVB) kwa lengo la kutafuta mnunuzi kabla ya masoko ya Asia kufunguliwa.le 13 mars 2023 © AFP

Kufilisika kwa Benki ya Silicon Valley kunasababisha wasiwasi mkubwa nchini Marekani miongoni mwa wateja, watu binafsi na kampuni (za ndani na nje ya nchi). Baada ya kutangazwa kwa habari hiyo mbaya, SVB ilijikuta ikizama katika uondoaji mkubwa wa pesa hadi ambapo Taasisi ya Dhamana ya Amana (FDIC) ilibidi kudhibiti hali hiyo. Mamlaka ya Marekani ilitangaza Jumapili Machi 12 mfululizo wa hatua za kuwahakikishia wateja kuhusu uimara wa mfumo wa benki wa Marekani na hasa itahakikisha uondoaji wa amana zote kutoka kwa SVB.

Mbali na SVB, mamlaka ya Marekani itaruhusu upatikanaji wa amana zote kwa benki nyingine, Signature Bank, ambayo imefungwa moja kwa moja na mdhibiti, kulingana na taarifa kwa vyombo vya habari. "Nimejitolea kwa dhati kuwawajibisha wale waliohusika na hali hii," Joe Biden alisema katika taarifa yake, akihakikishia kwamba "watu wa Marekani na wafanyabiashara wa Marekani wanaweza kuwa na uhakika kwamba amana zao za benki zitakuwa pale watakapozihitaji." Rais wa Marekani pia alisema atazungumzia tena suala hilo Jumatatu asubuhi: "Nitatoa tahadhari kuhusu jinsi tutakavyodumisha mfumo thabiti wa benki ili kulinda uanzilishwaji wetu wa kihistoria wa kiuchumi. "

Wale wanaohusika na kushindwa kwa benki itabidi 'wawajibike', alionya Joe Biden

Hifadhi ya Shirikisho (FED) - benki kuu ya Marekani - pia imekubali kukopesha fedha zinazohitajika kwa benki nyingine zinazohitaji kuheshimu maombi ya uondoaji kutoka kwa wateja wao. Hatua hizi zilichukuliwa kwa pamoja na Waziri wa Fedha Janet Yellen, FED na taasisi ya Dhamana ya Amana (FDIC), baada ya kushauriana na Rais wa Marekani Joe Biden, taarifa hiyo imesema.

Mfumo mzima unashuhudia msukosuko ambao unatishia mfumo wa benki wa Marekani, unaosumbuliwa na hali ya kuimarisha fedha kwa lazima. Kupanda kwa viwango kumeweka shinikizo kwa benki, ambazo zinakopesha muda mrefu na kukopa kwa muda mfupi, huku viwango vya muda mfupi hivi sasa vikiwa juu zaidi kuliko viwango vya muda mrefu. Pia wateja wamehimizwa kuwekeza pesa zao katika bidhaa za kifedha zinazolipa vizuri zaidi kuliko akaunti za sasa na imetikisa sekta kadhaa za kiuchumi, hasa teknolojia mpya.