Burundi : Human Right Watch latuhumu utawala wa rais Everiste Ndayishimiye
Shirika la kimataifa la kutetea haki za binadamu Human Right Watch, limesema maafisa wa usalama nchini Burundi wametekeleza dhuluma dhidi ya raia wa Burundi ,wanaoshukiwa kuegemea upande wa upinzani, au kushirikiana na makundi ya watu wenye silaha.
Imechapishwa:
Katika ripoti yake mpya, Human Right Watch imewahusisha polisi, idara ya ujasusi na vijana wanaogemea chama tawala kuwashumbulia raia na idara za serikali.
Human Right Watch limesema mamlaka nchini Burundi hajaonyesha nia yoyote ya kuendesha uchuguzi huru, ili kuwachukulia hatua wanaohusishwa na vitendo hivyo vya ukiukaji wa haki za binadamu.
Mtafiti mkuu wa HRW kanda ya Africa, Clémentine de Montjoye, ameutaka utawala wa rais Everiste Ndayishimiye, kuwachukulia hatua za kisheria, maafisa wa usalama wanaohusishwa na vitendo hivyo vya dhuluma, badala ya kuwalenga wapinzani wake.
Montjoye akisema raia wa Burundi wataacha kuishi na uoga serikali itakapowajibisha wanaohusika na vitendo hivyo.
HRW imesema ripoti yake imegemea ushahidi wa raia 30 wa Burundi, wakiwemo wafuasi wa vyama vya upinzani na watetezi wa haki za binadamu, kati ya Oktoba 2021 hadi April 2022.
Mashirika ya kiraia pia, yamekiri kutazama kanda za video ambazo polisi na wanajeshi walikiri kuhusiaka na mauwaji ya raia.
HRW kadhalika imekosoa Umoja wa Ulaya, Marekani na mataifa mengine kuonyesha nia ya kuboresha uhusiano na Burundi, licha ya ushihidi uliopo wa mamlaka nchini humo kuendelea kukiuka haki za binadamu.